الحلوم الجميله عز من شافها

المراوي كثيره مع زحام الحتوف……………..

والحلوم الجميله سعد من شافها

 

كل ما قمت الاقي في حياتي شضوف…………….

مع ملاوي(ن)كثيره زاد قصافها

 

كل ما جت تعدل سامني مااشوف…………….

واتمنى تطيب بطيب هفهافها

 

السعاده مخيله في سمانا تطوف…………….

والسهام الأليمه صعب ميلافها

 

وراعي الجود بذله للعليل مخلوف…………..

والمواقف كروم(ن)

طابت أصنافها

 

والبحر مع سكونه بالشجون محفوف……………..

ومن يقود البواخر يعرف اعطافها

 

والبحار إن تهادت في التهادي خسوف………………

أسأل اللي سبرها وصار عرافها

 

لااثبرت ماتردى ولاسقت ما تروف……………….

والنوايب ل لجت زاد اسرافها

 

كم سنين(ن)مشينا بين صمت ودفوف………………

والمبهذل يعرف ان كان لوافها

 

طال ليلي وانا ارقب كيف اسوس الظروف………………

كل ما جت تعدل عود ارجافها

 

اه ياوجد حال اللي لهمه غروف……………….

شوكة ف كف يده عجز في إسعافها

 

إن قعد ما إستراح وإن مشى به تحوف………

وإن تحرك يصيبه سهم عصافها

 

كل حلم(ن)اشوفه يعقب الحلم خوف……………..

وأين أروح ونفسي سامت اشضافها

 

اتغدا هموم(ن) وتعشا حشوف……………

بين آهات نفس(ن) تاه مجدافها

 

كل ما قمت اصلي واتبتل أشوف…………..

في التعاليل نفسي وطاب رفرافها

 

كيف لا والعباده مطلبي وبه شغوف…………….

والنفوس الكبيره عشق من شافها

 

والصبر والتبتل والرجا والعزوف…………..

عن دروب(ن)كئيبه تلوي أكنافها

 

طالبك يا إلهي يا الكريم الرؤوف…………..

تجبر العثرة اللي ضل روافها