الكاتب :سمير الشحيمى
جو البيت رطب ورائحه الغبار في كل بقعه في البيت المهجور وحياة تتنفس بصعوبه وقالت : أنت من وشو تبي مني؟
المختطف:أنا ماريد منك شي بس غيري اللي يبي منك.
حياة :ومن هذا الشخص؟
المختطف: شخص يعرفك زين.
حياة: حرام اللي تسوونه فيني.
المختطف : أنا بس أنفذ اللي يطلبوه مني ويدفعولي فلوس على هالشي.
حياة : إذا قام أبوي مصعب من غيبوبته والله بيوديك ورا الشمس.
المختطف يضحك: شخباري هاي الكلمه من زمان ماسمعتها ورا الشمس بس حلوه منك واللحين كرميني بسكوتك كلي أكلك بسرعه.
حياة : كيف آكل وأنا مربوطه.
المختطف : بفك عنك الحبل بس أي حركة تسوينها مره اكسر راسك بالعصا اللي بيدي.
وفك وثاقها وبدت تاكل حياه وتحاول تجمع معلومات عن المكان اللي هيه محجوزه فيه.
فيلا مصعب
في غرفة أصيله وهيه اطالع من بلوكنة غرفتها الشارع المقابل وسياره واقفه بطرف الشارع هيه سيارة التحريات دخلت أصيله وصكرت الدريشه وقالت : شكلهم هذيلا ماراح يخلوني بحالي وكل خطوه أخطيها يعرفون عنها شو الحل؟
غرفة نايف
(أنت حرامي يا نايف) قالتها سندس بوجه نايف اللي قام من مكانه وقفل الباب وقال : اوص سكتي شوفيك فضحتينا.
سندس : يعني نحن ماراح ننفضح أكيد راح ننفضح إذا درو عنك انك تسرق فلوس العملاء بالبنك.
نايف : بس سندس خلاص سكتي.
سندس : شو اللي خلاك تسوي كذيه مب صاحي أنت؟
نايف يطالع سندس بصمت بعدها قال: ايوه مب صاحي مب صاحي لأن أحبك ايوه مب صاحي لأني أموت فيج هذا اللي سويته عشانك.
سندس : أنا ماقلت لك أسرق.
نايف: يعني طلباتك اللي متخلص من وين أجيبهن ابا ذهب أبا خاتم أبا سنسال أبا سياره جديده أبا أبا أبا من وين وأنا اقولك ماشي عندي ماشي عندي أمي ماراح تعطيني العم مصعب تستحي اطالع بوجهه وهو شالنا شيل من نحن صغار لين كبرنا حتى وظيفتي هو اللي مدبرنها حقي من وين اجيب فلوس عشان أحقق أمانيك واحلامك فضطريت اختلس أموال من حسابات العملاء بطرق غير مشروعه.
سندس : ما أصدق بس خلاص أنا ما أجلس معاك دقيقه وحده بروح بيت أهلي.
نايف يمسك كتف سندس ويقول : شو تروحين بيت أهلك كل اللي سويته عشانك آخرتها تقولي بروح بيت أهلي بدل ماتوقفي معاي بمصيبتي.
سندس :اترك يدي وأنا ماضربتك على ايدك وقلت لك روح اختلس فلوس مب فلوسك.
نايف : حسافه والله حسافه ماتوقعتها منها منك.
سندس : أنا رايحه بيت أهلي وطلقني وفكني من شرك وبلاك تبي زميلاتي يضحكن علي أن زوجي حرامي لما يمسكونك.
نايف : هذا أنتي بس مهتمه بكلام الناس ولي يقولونه وبرستيجك جدامهم.
سندس تلم أغراضها قالها نايف : سندس على الأقل طلعي بيت أهلك بكره الصبح مب اللحينه شو راح يقولون أهلي وأهلك.
سندس طالعت نايف وجلست بالكرسي وسمعت شوره.
صباح يوم الثاني
فارس ينزل من سيارته ويدخل شركة مصعب ومعاه المحامي سليمان ووصل مكتب مصعب استقبلته السكرتيره شيماء ودخل المكتب ولقى أصيله بالمكتب وجالسه على كرسي المدير وقالت : هلا بفارس هلا بالمدير الجديد لشركة.
فارس: هلا بيك أم نايف ما شاء الله موجوده بالمكتب.
أصيله :هيه نعم لازم أسلمك كل شي بيدي وننقل الملكيه مني لك؛ شيماء خبري الموظفين في إجتماع بعد نص ساعه.
شيماء : إن شاء الله طال عمرك.
سليمان: ليش الاجتماع؟
فارس : عشان تطلع بماء وجه قدام الموظفين لما تبدل المدير العام لشركة.
أصيله تبتسم : يعجبني فيك ذكائك يا فارس تفهمها وهيه طايره.
البيت القديم في القرامطه
شيماء مربوطه بالكرسي والمكان مظلم شعاع نور الشمس يمر خفيف كخيوط من الدريشه اللي تم تصكيرها بلوح وخشب قديم؛ حاولت تفك الحبل اللي ملفوف بيدها ولكن من دون فايده.
حيدر في سيارته يتصل على زوجته تماضر قال لها : كيف امورك حبيبتي؟
تماضر :الحمد لله زينه
حيدر : متى تخلص مناوبتك بسكن الطالبات؟
تماضر :الساعه 7 المساء.
حيدر: عيل بمر عليك بمكان السكن وبنطلع عازمك على السينما العشا بمطعم حلو من اختيارك.
تماضر : لا والله شو المناسبه؟
حيدر : واحد مشتاق زوجته ويبي يطلع معاها طلعه رومنسيه فيها شي؟
تماضر تضحك :لا مافيها شي وأنا انتظرك بعد الدوام.
حيدر :اوك نلتقي.
شركة مصعب
( اتمنى الشركة مثل ما كانت ماشيه بأيام مصعب وبأيامي أبيها تمشي مثل الساعه مع مديركم الجديد فارس؛ تقدرون تروحون مكاتبكم شكرا.) قالتها أصيله للموظفين كنهاية للاجتماع اللي طلبته.
فارس : خطبك رنانه أم نايف ماعرفت إنك متحدثه متمكنه.
أصيله :لا تنسى أن زوجي مصعب.
فارس : بالفعل كلامك صحيح الله يقومه بالسلامة.
سليمان : أنا كذيه خلص شغلي معاكم وبسير اشوف باقي مصالحي.
فارس واصيله :الله معاك.
طلع سليمان من المكتب وقالت أصيله:اظن عادي أجي المكتب من فتره لفتره ولا ممنوع.
فارس يضحك : لا بالعكس المكان مكانك تنورين بأي وقت.
أصيله : تمام عيل أنا أستأذن.
فارس : الله معاك.
أصيله في سيارتها يرن هاتفها رقم غريب كان رقم المختطف ترد : ألو
المختطف : أم نايف؟
أصيله : أيوه من معي؟
المختطف : حياة موجوده معاي من 3 أيام تعالي نلتقي عشان نخلص من هذا الموضوع.
أصيله : أنت مب صاحي تتصل فيني خلي تواصلك مع شذى بس؛ بعدين كيف حصلت على رقمي؟
المختطف : هذا الكلام كله مش مهم تعالي نتقابل اليوم ويجيبي معاك المبلغ اللي متفق عليه.
أصيله : أنت شكلك ماتفهم؛ أنا مراقبه.
المختطف: تعالي عند مجمع السيتي سنتر ووقفي السياره عند المدخل الرئيسي وأنا بتواصل معاك بعدها.
أصيله : بس أنا مايمديني اروح البنك واسحب.
المختطف : في وقت لا تحاتي وفي عيون ثانيه غير عيون التحريات اتابعك أنا بكون معاك كل خطوه.
وصكر الخط وقالت أصيله بين نفسها : شو اللي بلشني هالبلشه الله يستر بس.
يتبع…
