الشاعر محمد عبد العزيز رمضان
كل اللي بِنَّا كان كلام
كل اللي بنَّا كان ملام
كل اللي بنَّا كان دموع
كل اللي بنَّا كان غرام
وسألت نفسي أنا مش سعيد
وحبيبي عني بعد بعيد
أنا نفسي يرجع من جديد
وكفايه يا حبيبي الخصام
طولت يا حبيبي الغياب
دقيت عليك أنا كل باب
وتعبت م اللوم والعتاب
أنا ظني فيك يا حبيبي خاب
مش باقي غير كلمة وداع
والحب بِنَّا كله ضاع
ما فضلشي غير كدب وخداع
لما اشتريته هو باع
وسهرت دوبني الحنين
ما عرفش هيوديني فين
وعليه بنادي من سنين
أشكي يا قلبي واروح لمين
وشبعت من كتر الوعود
حبك حبيبي مالوش وجود
وظلمتني وخنت العهود
صعب اللي بنَّا ف يوم يعود
زودت يا حبيبي الجراح
مش هبكي على كل اللي راح
أنا طير ومكسور الجناح
رغم الضلام ييجي الصباح
هنساك وهنسى الذكريات
أنا مش هعيد كل اللي فات
هاعتبره حلم وراح ومات
عمر اللي بنَّا ما كان ساعات
كان كلمة حلوة من القلوب
لحظة شروق مالهاش غروب
وجرحني رمشه وفيه بدوب
مشتاق وتايه في الدروب
يا حبيبي يا أجمل عيون
مش ممكن أبعد أو أخون
ولا يوم هتغلبني الظنون
بعدك نهايتي والجنون
