ليلى براده
وا تعالي وتعالي
تعالي ياختيتي
وتعالي
يلا ماهزاتك
الأرض
يهزوك كتافي
غير تعالي اختيتي
وتعالي
وجه الله والبزيزلة
دالميمة الحنينة
يلا ما غير تعالي
راني حتى انا كنقاصي
من الوحدة فوسط
الجماعة كنعاني
تعالي ياختيتي
تطيري على مابيا
نتناوسو
نتفكرو زمان اللمة
العشرة مع الخوت
فالمدينة القديمة
وخدمة الصيف
ياك اختيتي عاقلة
ليبرة والصابرة
فتل وخدم
وخود الفلوس
سير لبوطويل
مول لاباني
العياشي ومن لا يعرفه
خود المحنشا والكاس
داللوز بليكلاص
ودور فالقيسارية
ودخل لمولاي إدريس
ارتاحلك شويا
وها عشية دازت
بالضحكة من القلب
فين هي
أودي ياختيتي
غير تعالي
نرجو ديك ليام
واخا غير بالتعاويد
ونحيدو القنط
ولو غير شوية
