رابية الأحمد.
كان ياما كان
العيشة كانت عال العال
وكل واحد مرتاح البال
لافي هم ولافي غم
وكنا نحنا بوحدة حال
جيرانك كانو مساكين
يخافو عليك وشو محبين
اللقمة مقسومي ل تنين
حتى لو مامعهن مال
كانو مواسم هالخيرات
من الحنطة نعبي شوالات
من العسل نملي الجرات
وما منسمع لا قيل وقال
خبز التنور وكارة
مواويل وع الهوراة
أمي تنادي للجارة
تعالي غنيلك موال
وشو بتذكر عند البير
صبايا من الفرحة بطير
صوتن زقزقة عصافير
سحر واية من الجمال
وطاحونة بغربي الضيعة
ع صوتا نصحى ونوعى
الدمعة كانت ممنوعة
وكنا مضرب للأمثال
راحت أيام الطيبي
وصارت دنيا عجيبة
والله اكبر مصيبي
الضحكة ما عادت تنطال
