الكاتب :سمير الشحيمى
(أنا أريد أطلع مصعب من المستشفى أريح حقه يكون فبيته وسط أهله)
جمله قالتها أصيله لمدير المستشفى والدكتور اللي مشرف على الوضع الصحي لمصعب.
الدكتور : بس وضعه الصحي مايسمح إنه يطلع من هنا وهو مازال بغيبوبته.
أصيلة : راح أجهز له غرفه خاصه بجميع معداتها الطبيه.
الدكتور : بس بعد ما يغني أن الأفضل له أنه يكون معانا بالمستشفى.
أصيله: من كم يوم خبرتكم بسفره برا للعلاج قلتو إنه حالته الطبيه ما تحتاج وهو في غيبوبه اللحين من شهر ومافي شي جديد.
مدير المستشفى : ومحتاجه فريق طبي عندج بالبيت يتابعون حالته أو أقل حاجه ممرضه.
أصيله : نسيت إنته أن بنتي ضحى وزوجة ولدي سندس ممرضات وراح يباشرن على حالته وراح أجيب ممرضه خاصه تكون ترعاه.
الدكتور :ماعرف شو أقولك.
أصيله : ماله داعي تفكر عطني الموافقه.
مدير المستشفى : خلاص خليهم يسوون اللي يبونه وهم يتحملون مسؤولية مريضهم.
أصيله : نحن مسؤوليين والمريض اسمه التاجر مصعب.
الدكتور: خلاص راح اعطيكم الموافقه لخروج مصعب؛ متى راح تجوون تاخذونه؟
أصيله: من تجهز الغرفه بجميع المعدات الطبيه اللي يحتاجها راح نجي ناخذه.
مدير المستشفى : وسيارة الإسعاف علينا ولا يهمك أم نايف.
فيلا مصعب
حياة جالسه بالصاله وجايتنها زياره صديقتها ميره قالت لها ميره : افتقدتج بالجامعه والبنات يسألن عنج بالجامعه والاساتذه وكلهم يسلمون عليج.
حياة : فيكم الخير والبركة حبيبتي.
ميره : متى راح ترجعي الجامعه ترا وااايد محاضرات راحن عليج.
حياة: والله من بعد طيحة أبوي مصعب صار مالي بارض وخاطر لأي شي بس أريده يقوم بالسلامه لنا.
ميره: بس هاي دراستك ومستقبلك حبيبتي حياة ولو عمي مصعب يعرف شو تسوي بنفسك كان بيزعل عليج.
حياة: هو يقوم من غيبوبته وينازعني وراضيه حتى يضربني بس اهم شي يكون بخير وعافيه.
ميرة: كيفها معاج عمتك أصيله؟
حياة: من بعد طيحة أبوي مصعب أستوت الآمر الناهي بالبيت والشركة تخيلي حتى السياره سحبتها عني. قالت تبي تروحي مكان يشلك السايق.
ميره: شو هاي صاحيه ما أظن صاحيه إلا أستخفت بعد؛ السياره من عند العم مصعب.
حياة : والله شو اقولك صارت قويه بزيادة وتحيديني ماروم عليها وأبوي مصعب هو اللي كان يحامي عني ويدافع.
ميره: ما قول غير كان الله في عونك حبي.
حياة : الحمدلله على كل حال.
ميرة: أمسكي هاي الملخصات مال المحاضرات اللي فاتتك مال شهر ونتريا رجعتك بسرعه للجامعه حبي.
حياة: تسلمين يا أغلى وأعز صديقة وأخت بحياتي.
شركة فارس لتجارة
فارس جالس خلف مكتبه يرن تلفونه مدير المخازن التابعه لشركته قال: هلا العم فارس كيف الحال؟
فارس : اهلين وسهلين طمني كيف الشحنه اللي بمخازن شركة مصعب عساكم خلصت لأن الشركة بصحار تنتظر البضاعه توصل مخازنها المسا.
مدير المخازن: لا والله للحين معرقلينا طال عمرك.
فارس : كيف معرقلينك ماحملتوا البضاعه للحين ترا الشحنه مب شويه محتاجه ٤ شاحنات وأنا موقف كل شي هاليوم عشان هاي البضاعه توصل من دون تأخير.
مدير المخازن: والله هذا اللي صار لما كلمت مدير مخزنهم قال هاي أوامر من إدارة الشركة إنه لازم ندفع 50 ألف ريال مستحقات الدفع من 6 شهور.
فارس : شو هاي المهزله اللي حاصله صكر بشوف كيف الأمور.
يتصل على مكتب السكرتيره شيماء ترد عليه : هلا أستاذ فارس.
فارس : شيماء شو هذا اللي سمعته اللحينه متصل علي مدير المخزن مالي يقول معطلينه بمخازنكم عن التحميل ليش؟
شيماء: أستاذ فارس أبي منك العذر والسموحه بصراحه بالفعل هذا اللي صار لأن في مبلغ مستحق الدفع لازم تدفعه شركتك بعدين تقدرون تحملون بضاعتكم.
فارس : هالموضوع أعرفه ومتفاهم مع مصعب الله يقومه بالسلامه وبدفع مع الوقت.
شيماء : أنا عارفه والله عارفه بس هاي الأوامر جايه من أم نايف المديره الحاليه.
فارس : وهيه أم نايف ماتعرف أن البضاعه لشركة فارس؟
شيماء: عارفه وكلمتها وقلت حقها أن شركة فارس وشركة مصعب عندهم معاملات خاصه ومتفاهمين على كل شي؛ قالت لي مالك دخل. عليك تنفذي وتعطي تعليمات للمخازن.
فارس : حوليني عليها اذا هيه بالمكتب.
شيماء : لا والله للإسف طالعه.
فارس: خلاص راح أكلمها بتلفونها. صكر الخط
في سيارة أصيله وهيه متجهه لبيت شذى والسايق يسوق رن تلفونها فارس متصل عليها ردت وهيه تبتسم ابتسامه دهاء وخباثه: هلا هلا بالتاجر فارس مرحبا وسهلا.
فارس : اهلين أصيله كيف الحال.
أصيله : بخير لله الحمد تفضل آمرني.
فارس : شو اللي مسوتنه أنتي مع القرارات الجديده اللي منزلتنها؟
أصيله : أي قرارات ماعرف عن أي شي.
فارس : عن الاستعباط أم نايف أنتي عاطيه أوامر أنه مايتم تخريج وتحميل البضاعه اللي بمخازنكم اللي هيه تبع شركتي إلا من ندفع المبالغ المستحقه السابقه؟
اصيله: نسيت تصدق اسمحلي والله بس صحيح الكلام أنا عاطتنهم الأوامر بصراحه راجعت ملفات الشركة لقيت في مبالغ خارجيه مستحقه لشركة منضمنها شركتك.
فارس :أنا ومصعب الله يقومه بالسلامه متفاهمين على كل شي وأنا أدفعله كل نهاية سنه مبلغ كامل.
اصيله: كلامك على عيني وراسي بس مصعب الله يقومه بالسلامه يارب بغيبوبه من شهر وأنا اللي أدير الشركة حاليا فلابد انك توفي مبلغ اللي عليك وفالك طيب.
فارس : يا ام نايف ترا هاي البضاعه مستعجل عليها ولا راح ادفع غرامة تأخير وأنا ما عندي سيوله ادفع المبلغ كامل حقج فهمي والبضاعة اليوم لازم تطلع وتوصل لأصحابها.
اصيله:كان ودي اساعدك بس ما اقدر مثل ماعليك أنت اللتزامات حتى نحن علينا اللتزامات.
فارس : واللحين كيف؟
اصيله:لازم تدفع مافي غير هالحل وعشان العشره والمخوه بينك وبين مصعب زوجي الله يقومه بالسلامه ادفع 20 الف ريال والباقي بعد شهر من تاريخ اليوم كذيه أنا عداني العيب.
فارس : هو من ناحية عداك العيب عداك هيه نعم خلاص المبلغ باكر بيكون معاك بالمكتب.
أصيله : كذيه أنت صح وأمورنا بالسليم اللحين بخبرهم يفرجون عن بضاعتك.
صكرت الخط وهيه تضحك وتقول : والله لا اوريكم واحد واحد اتصلت على شيماء : الو شيماء اتواصلي مع المخازن خلاص خليهم يسمحون لشركة فارس لتجاره بتحميل بضايعهم وبعد العمال اللي معانا يساعدونهم حرام وايد أخرناهم يالله باي.
أغلقت الخط وفي عينها شر وخبث يستطير.
يتبع…
