الكاتب :سمير الشحيمى
الشركة
تنزل أصيلة من السياره وتدخل الشركة وتتوجه إلى مكتب مصعب؛ استقبلتها السكرتيرة شيماء وجلست أصيله وقالت لها شيماء: نورتي أم نايف كيف صحته العم مصعب إن شاء الله أحسن؟
أصيله : بعده حالته مثل ماهيه من يومين بالمستشفى تحت ملاحظه الدكاتره.
شيماء : الله يقومه بالسلامه يارب.
أصيله : اللهم آمين؛ كيف الشغل؟
شيماء: الحمدلله ماشيه الأمور مثل ما كان يبيها العم مصعب الله يطول بعمره.
أصيله: تمام أريد أجتمع بالموظفين ومدراء الأقسام ككل بعد ساعه.
شيماء بإستغراب: ليش يا أم نايف؟
أصيله: أنتي شغلتك هنيه تقولي نعم وأن شاء الله فهمتي؟
شيماء : إن شاء الله.
مكتب المحامي سليمان
أحمد زوج ضحى في مكتبه يجهز أوراق المرافعات لمحكمة بكرا دخل عليه صاحب المكتب سليمان وقال له: ها كيف الامور معاك؟
أحمد :زينه لله الحمد
سليمان : حلو انا بسير المحكمه عندي جلسة استماع بس جاي اخذ أوراق مهمه وساير.
أحمد :زين بالتوفيق أنا بكره عندي جلستين.
سليمان : ربي يوفقك انت احسن واحد عندي بالمكتب لك مستقبل كبير بالمحاماه.
أحمد : مشكور على الكلام الطيب أستاذي.
سليمان: تستاهل كل خير؛ طمني كيف صحته التاجر مصعب سمعت أخبار عنه بالسوشال ميديا والصحف أنه أصيب بوعكه صحيه.
أحمد : الأخبار صحيحه وهو حاليا بالعنايه المركزه فاقد الوعي.
سليمان: الله يقومه بالسلامه يارب.
أحمد: اللهم آمين.
سليمان : إذا حاب تأخذ إجازه وتكون جنب أهل زوجتك عادي تقدر تاخذ إجازه وبحول قضاياك على محامي ثاني من زملائك.
أحمد :الأمور طيبه ماله داعي الأوضاع حاليا مستقره ونتريا الاخبار الطيبه.
سليمان: ولا يهمك حاظرين وأن شاء الله يقوم بالسلامه بس اذا صار لا سمح الله أنت عارف كيف الأمور أنت المحامي والمحاماه أمانه َمسؤوليه
أحمد جلس يفكر وسرح بفكره بعيد.
فيلا مصعب
مزن رايحه الجامعه وهيه بطريقها طالعه من البيت حصلت حياة جالسه بالصاله قالت حقها : كيف ماراح تروحي الجامعه؟
حياة : لا مالي خلق.
مزن: وين أمي؟
حياة: أعتقد راحت الشركة سمعت كذيه تخبر إخوانك اليوم الصبح.
مزن: ليش عاد سيدة أعمال ولا شو؛ يالله تستاهل المامي.
حياة: أنا أقول كذيه بعد تستاهل العمه.
مزن: كنه ماعاجبنك؟
حياة صامت ماترد عليها قالت مزن: يالله أنا رايحه الجامعه باي.
حياة تكلم نفسها بسير المستشفى أطمن على أبوي مصعب.
شركة فارس للتجاره
فارس موجود بمكتبه ومعاه عدد من رجال الأعمال مال البريمي جايين يتقهوون عنده قال واحد منهم: من وصلنا خبر طيحت التاجر مصعب كلنا نسأل عن صحته وكيف صار وضعه.
فارس : مشكورين على اهتمامكم وسؤالكم عن أخوي مصعب هيه أزمة صحيه وراح تعدي ان شاء الله
جاوب الثاني: هذا واجب أخوي فارس الأخ مصعب منا وفينا وله وقفات ما تنكر مع كل اللي بالغرفه.
فارس : من طيب أصلك؛ يا صبي صب القهوه لضيوف.
البنك
نايف في مكتب مدير البنك يسأله: كيف صحة عمك مصعب؟
نايف: لا جديد يذكر بعده في العنايه من يومين.
المدير : كل الصحف تتكلم عنه وتتسآل عن وضعه الصحي الله يقومه بالسلامة.
نايف : اللهم آمين.
وزارة التربيه والتعليم
حيدر بمكتبه وزميله مع بالمكتب يقول: ما شاء الله الاخبار ماعندهم اليوم غير عن التاجر مصعب وطيحته بالمستشفى.
حيدر: خيره على الكل عمي مصعب وافضاله كثيره على الجميع أولهم بيتنا.
محمد: كلامك صحيح وربي يحفظه لكم ويقومه بالسلامه.
المستشفى
الأطباء مجتمعين مع مدير المستشفى وسندس وضحى معاهم قال أحد الدكاتره: مضت 48 ساعه وبعده في غيبوبته.
الدكتور الثاني : المؤشرات الحيويه كلها مستقره بجسمه.
الدكتور الآخر : علينا الإنتظار.
مدير المستشفى : المشكله أن في ضغط علي من الإعلام والكل يسأل عن وضعه الصحي.
الدكتور: راح يقوم من غيبوبته بأسرع وقت أنا واثق من هالشي أن شاء الله.
سندس تقول لضحى: ضحى لازم تروحي ترتاحي وتشوفي اعيالك من يومين أنتي ماسرتي بيتك.
ضحى : قلبي وعقلي مع عمي مصعب كيف اروح واخليه.
سندس : ربك بيقومه بالسلامه بعونه سبحانه بس انتي روحي تطمني على اعيالك وزوجك محتاجينك سيري ارتاحي وتعالي بعدين من ترتاحي.
ضحى: تمام اذا في أي شي تواصلي معاي عل طول.
سندس : إن شاء الله ولا يهمك.
شركة مصعب
كل الموظفين مجتمعين بغرفة الاجتماعات برآسة أصيله زوجة مصعب اللي قالت: أنا اليوم أجتمعت فيكم عشان تتعرفون علي خلال غياب مديركم وصاحب الشركه أنا أم نايف زوجة التاجر مصعب وأسمي أصيله بس يفضل تنادوني أم نايف؛ واتمنى من الجميع يتقبل وجودي بالشركة في ظل غياب زوجي مصعب ودعواتكم له أنه يعود لنا بصحه وعافيه؛ أما ما أحب حد يتأخر عن العمل وأي شي يتعلق بالعمل لازم اعرف عنه اول بأول أنا غير عن مصعب أنا صبري قليل وبالي ما طويل اذا شفت شي مايعجبني على أطول اعاقب ما ما احب اعطي فرص؛ حد عنده شي حاب يقوله يتفضل.
الكل يطالعون بعضهم بعض والصمت يعم الجميع.
أصيله : تمام عيل كل واحد إلى مكتبه.
يتبع…
