أنفاس الفجر
نوتة الحزن بلت بالقوافي الجروح
وصار حزن المعنّى واضح بمحجره
حابس دموع عينك خايف انها تنوح
وماتدل الطريق لخدك وتعبره ؟؟
هاك من خافقٍ يغليك قلبٍ وروح
وهات كسرة خفوقك خلني اجبره
لك مكانه بصدري لو نويت النزوح
يحضنك داخل ضلوعه قبل تهجره
المسافة تجافي والعلاقة بوضوح
تستحق الشعور اللي معاك اشعره
كل ما قلت بافتح باب صمتي تروح
وكل ماقلت باسكت جيته .. تبعثره
لاتهز الكتوف اللي عليها .. تبوح
وراسك اليابس بصدري تعال اقبره
معجزتك بغرامي اللي رقا بك صروح
وانت معجز وجودك كل من في الكره
ومعجز احساسي الوافي بكل الشروح
يشرح شعوري اللي كل عام .. أجبره
يحفظك بين طيات العمر مايشوح
وجه صبره على كسبك وبه مقدره
انت تشبه لحلمٍ بالغوالي شحوح
ودك ان الحلوم لها .. بعد تذكره
لك بساتين فل وياسمينٍ .. تفوح
وقدرك اللي بقلبي .. اووه .، يامكبره
لو يوزع يكفي .. كل قلبٍ .. ينوح
لين ينسى وجعه وبالفرح .. يعمره
كيف ماافتح لحبك باب وانت الطموح
وحزن صوتك وربي يا ….. ما أقدره
–
