الشاعر: أحمد عبد الحق
سنين مرت علي موتك
وبفتكرك
وبحن كتير أنا لحضنك
وبحتاجلك
ماأنا حتة حيه من جلدك
زمان لما أغلط
كنت بطيبة تسامحني
ولما كنت بتألم
كان حضنك بيشفيني
ولما آتوه وسط ذنوب
تقولي ياواد أنسى وتوب
وجودك كان بيهديني
آخر وصيه ليك
خلي بالك من أخوك
وأحمي أختك
حتي لو في يوم باعوك
أفتكر بس ديما
إنهم من ضهر واحد
من بطن واحده
أفتكر الأمانه
خليك قد الأمانة
أفتكر أمك و أبوك
أوعاك الدنيا تشغلك
أو إبنك في لحظه
عن حب أمك يبعدك
حاسب من الأيام
تداين تدان
لو نسيت في لحظه ياأبني
هتيجي الأيام وتعدلك
وتعلمك وتفهمك
إن حب الأم مش بالكلام
من غير دعواتها
أقل قشه في الحياة هتكسرك
والله ياما وحشتيني
كل يوم في المنام
أحس صوتك بيرقيني
وأحس إيدك علي ضهري
تطبطب وتمسح دمعتي
أبوس إيدك وأبوس رجلك
ضفر رجلك دوا عيني
وحشتني
واه يا غاليه يوم روحتي
يوم غبتي
جمد كل شيء فيه
حتي الدم اللي جوايا
رافض يعيش بعدك
رافض يمشي في شراييني
بحبك حب مش موصوف
قالوا حروف وقالوا ظروف
ولسه بكرة ياما نشوف
وأنا بقولها وعالمكشوف
البنت مش نافعه ولا الولد
كل المشاعر بتنقرض
ألا حب الوالدين
حبهم بدون مبالغه
بدون مقابل رغم موتك
لسه دعواتك ليه السند
ممكن طلب ..ممكن رجاء
لوحسيتيني
في يوم في ضيق
عوضيني
قسوة الأيام والولد
