الشاعر محمد عبد العزيز رمضان
دق الباب وفتحت لقيت
أطفال بتبارك وتهني
قالوا يا عمو تعال مشيت
وياهم نفرح ونغني
َونقول يا رمضان هليت
ومليت الدنيا بأفراح
تراويح وعباده أنا صليت
من جوايا مسحت جراح
شهر كريم عمرت البيت
والهم خلاص ولى وراح
دق الباب وسمعت الصوت
بيقول هل هلال رمضان
وفرحنا من بعد سكوت
شهر كريم شهر الإحسان
يحيي قلوب من بعد الموت
ركن أساسي من الأركان
دق الباب رمضان قال جيت
قلت اتفضل الف سلام
قمت بسرعه كدا اتوضيت
قلت خلاص أنا مش راح أنام
نفسي أحج وأزور البيت
وأصلي وأصوم وابقى تمام
رمضان نادى عليه رديت
بعباده وذكر وأحكام
دق الباب رمضان أهو جانا
واتجمع كل الأحباب
والناس تضحك كده ويَّانا
ولا فيه لوم ولا كتر عتاب
رب الكون بقدومه هدانا
تتفتح فيه الأبواب
خيره كتير عمره ما ينسانا
لو تسأل هتلاقي جواب
رمضان كدا محفور جوانا
نشتاقله من بعد غياب
غنوا وقولوا وقولوا معانا
قلبنا من حبك أهو داب
