المهدي تركي الرياحي جدة . السعودية
أنت ياللي تنصح الناس والناس انصحوك
ابد في نفسك بالأفعال من قبل الكلام
لا تحدث غير من حسن سيرة والسلوك
لين نضمن سيرتك في الحلال وفي الحرام
أما أنا أعرف ضحكة الغدر في فم الضحوك
لو لبس بشت التدين يبي منا إهتمام
وأعرف اللي سيرته ما يجي فيها شكوك
التقي اللي لبس بشت من أمن وسلام
ياضميري مشترين الضماير مشتروك
ماتغيّر لو تغيّر طبع كل الآنام
مخلفين الناس عن طيبهم ماغيروك
ولو تحس إنك تغيرت والله ماتنام
ما يحبك فالبشر مثل حب أمك وأبوك
لو فرشلك من يصيد الفرص ريش النعام
ولو تنازل عن مباديك صفوا لك وجوك
صف متاخر وصفين عندك بالامام
لا يهمك لو يمرونك و ما عبروك
أنت فوق أدراكهم لا تلحقهم ملام
سيرتك معروفه ومثبته مثل الصكوك
وفوق منكبك النياشين وأكثر من وسام
لا تحرا عالم ٍ في دجى ليلاً دكوك
مثلهم مثل العمى مايشوف إلا الظلام
لو جمعت ألفين منهم صديقٍ ما نفعوك
أصدقاء ذا الوقت لأجل الدراهم والطعام
ولو تعلق لك عباية على إحدى الشبوك
امتلت ساحاتها من مجاريح الغرام
من مزورة العواطف مصبغّة السلوك
الهيام اللي مداهيلها واد الهيام
شفتهم في كل سوق ومقاهيها بروك
الخفاف اللي يطيرون مع صوت الحمام
ذا سببهم ياضميري وإلا حولك شكوك
لا غرابة يوم في الذايقة صار انفصام
