الكاتب :سمير الشحيمى
الصباح في منزل سيف تحديداً في غرفة نومه سيف يقول لمزنه وهو خارج من دورة المياه : تصدقين مزنه خبرني أبويه مشتري شاليه في الغربيه صوب منطقه الهرميه وين مدينة المرفأ.
مزنه منشغله بوضع المكياج قالت: ليش شو يباله مكان بعيد عليه؟
سيف : خبرته مكانه بعيد قال أحسن الجو هناك حلو وقريب البحر وبعيد عن الضجه والأزعاج.
مزنه : يالله الله يباركله عميم بحلاله وربي يسعده.
سيف : الحمدلله كيف بيت الأهل شو اخبارها عمتي؟ ما سألتك البارحه.
مزنه : كلهم بخير ويسلمون عليك.
سيف : بسير أطمن على غيوده إذا وعت من الرقاد وأنتي جهزي عشان غدانا بيت أهلي اليوم.
مزنه : أن شاء الله.
طلع سيف من غرفته ودخل غرفة غيداء اللي كانت تلعب بدميتها باربي ومن أحست أن باب غرفتها يفتح إدعت أنها نائمه شقاوة الأطفال الجميله دخل سيف الغرفه ووجدها نائمه وكان يعلم إنها تدعي النوم فجلس بجوارها على السرير ثم أبعد عنها دميتها باربي وهو يقول: هاي اللعبه بسها بعقها بالزباله.
فتحت عينها غيداء بسرعه وهيه تمسك بالدميه قائله: لا لا كله ولا باربي.
سيف يضحك: ها شيطونه مخليه نفسك راقده ها.
غيداء : شبعت رقاد.
سيف : زين أنا أعرفك ماطولي وايد بالنوم ادريبك.
غيداء : بابا تعرف البارحه مواز ماخلتني اللعب بلأيباد مالها.
سيف: أممم خلاص من تنجحين بالدراسه باخذلك أيباد وأحسن وأحلى أيباد بالسوق شو تبين بعد؟
غيداء: واعدني توديني الحديقه.
سيف : صح واعدنك بس اليوم أحس نفسي مرهق شورايك انسير الحديقة أنا وأنتي وأمك الأسبوع الجاي بس طلعه حقنا نحن الثلاثه نلعب ونستانس شو رايك.
غيداء مستانسه: وناسه خلاص عيل الاسبوع الجاي بنسير بابا أحبك.
سيف يحضن غيداء: وأنا بعد أحبك يا عمري أنتي، يالله نشي وسبحي وتعالي تحت نتريق لأن بعدين بنسير زيارة بيت يدوتك موزة.
غيداء : وناسه اللحين بنش.
منزل أهل سيف
الكل مجتمع بالصاله من عائلة سيف وعائلة بطي قال بطي : سيف كيف الموتر معاك ؟
سيف : أموره طيبه ليش؟
بطي : عندي الموتر يرفع حراره وممشاه ثقيل.
سيف: متى آخر مره مسرفس الموتر؟
بطي : من سبع شهور تقريباً
سيف : ياربي أنت دوامك سويحان تروح وترجع يومياً معقوله ما مسرفس الموتر هالفترة كلها ترا عمر موترك من طلعته من الوكاله غير سنتين بس.
خميس : بطي من يوم يومه مهمل ما شغلته يجلس يعدل ويسرفس كل شي يبيه جاهز.
بطي : والله يا أبويه ما حب وقفت الصناعية.
خميس : عشان كذيه السيارات ماتعمر معاك هاي ثالث سياره تأخذها خلال ثمان سنين.
مزنه : عاد سيف مايحب يخلي موتره من دون سيرفس حتى موتري لازم أول بأول.
سيف : عشان يعمر الموتر فترة طويله منو فاضي يشتري ويبيع بالمواتر كل سنه أو سنتين.
موزة تأتي من المطبخ : خلي عنكم السوالف السيارات وغيره وقوموا تتغدون جهز الغداء.
ذهب الجميع لتناول الغداء وفي نهاية اليوم وفي منزل سيف تحديداً غرفة غيداء يضع سيف ابنته غيداء في فراشها وقال لها : من بعد هذا اليوم الطويل لازم ترتاحين وتنامين باكر مدرسة.
غيداء : باكر عدنا امتحان عربي نكتب الكلمات الإملائية بشكل صحيح.
سيف : حضرتي عدل للامتحان؟
غيداء : هيه أكيد وراح أجيب درجات كاملة.
سيف : هاي هيه بنتي الشطورة.
غطى سيف غيداء واغلق الإضاءة بغرفتها وذهب لغرفته ووجد مزنه بالسرير فقالت له : نامت غيوده.
سيف : اي نامت.
اطفئ النور.
يتبع…
