الكاتب :سمير الشحيمى
( كم مره قلت حقك أي شي يضايق حياة تراه يضايقني أنا)
قالها مصعب لأصيله وهم في غرفة نومهم ردت أصيله : بس حابه أعرف شو سر الأهتمام الكبير بهاي البنت اللي مانعرف من وين جبتها ومن هم أهلها.
مصعب: في حاجات مالازم تعرفيها.
أصيله طلعت الورقه اللي حصلتها طايحه بأرض مكتب مصعب وفرتها عليه وقالت: مثل هذا البيت اللي مسجل بأسم حياة بيع وشراء.
مصعب يمسك الورقة ثم طواها وحطها بجيبه وقال: لآخر مره أقولها حقج لا تدخلي في أمور ما تعنيك لأن مرات الجهل نعمه لبني آدم.
قالها مصعب هاي الجمله وطلع من الغرفه تارك أصيله بروحها بالغرفه من دون إجابات لأسئلتها.
في غرفة نوم حيدر وهو جالس يرتب أوراق عمله في الشنطه قال: تصدقي يا تماضر في شيء شاغل بالي هالفتره وأريد أستشيرك فيه.
تماضر : وشو هو؟
حيدر : أفكر أسوي مشروع عشان أزيد دخلي الراتب بروحه مايكفي.
تماضر : فكرة حلوه بس شو المشروع اللي براسك؟
حيدر: فكرت بمشروع بسيط مايحتاج رأس مال كبير بس يبيله تسويق بوسائل تواصل الأجتماعي.
تماضر : حلو بس شو هو المشروع؟
حيدر : تنسيق هدايا وتغليف من عطور واكسسوارات أعياد ميلاد أفراح تخرج.
تماضر : الفكره حلوه بس مكرره ولكن ماتحسها إنها تصلح للبنات أكثر من الرجال اسمحلي يعني على الكلام اللي قلته.
حيدر : لا بالعكس مايمنع لأن هذا شغف وأنا أحب ترتيب وتنسيق في مره جبت لك هديه وماعجبتك؟
تماضر : الشهاده لله بصراحه كانن حلوات اللي تجيبهن.
حيدر : لأن كانن من تصميمي وفكرتي بس المحل نفذ الفكره اللي أنا أبيها.
تماضر : صج والله توني أعرف من اللسانك بصراحه عيل واايد حلو إذا كذيه توكل على الله وأنا بساعدك وبجيبلك زباين.
حيدر : كفو عليج والله حبيبتي.
( أمك تغث أمك ماتنبلع أمك هوايتها النكد) كلام قالته سندس وهي معصبه رد عليها نايف: سندس لا تنسي هاي أمي وما أرضى هالكلام اللي تقولينه عنها.
سندس : من حرتي تحب تشوفنا متضايقين بعدين دامك ماخذ منها الفلوس شكلها متضايقه إنك أشتريت الخاتم اللي بيدي من فلوسها ومحتره.
نايف: الله يخليك خلاص صكري على الموضوع ولا تحطيه فبالج.
سندس: وهذا عمك مصعب يعطي مواعظ وحكم وهو فلوسه ماعرف من وين جابهن؛ صح أنت قايل ماخذ فلوس من عند أمك وتحت قلت ماخذ الفلوس من ربيعك اللحين شو الكلام اللي صح ماخذهن من عند أمك ولا متسلف من ربيعك.
نايف: لا حول ولا قوة إلا بالله العلي العظيم شكلنا اليوم ماراح نخلص أحسن الواحد يحط راسه وينام.
سندس : بس هذا اللي فالح فيه.
وفي غرفة مزن وحياه كل وحده بسريرها مزن تتكلم بتلفون مع أفنان وتقول لها اللي صار والكلام اللي قالته أمها أصيله لحياة وفشلتها قدام الكل؛ وحياة تمثل إنها نايمه ومغطيه نفسها بالبطانيه وتسمع كل كلمة تقولها مزن ودمعتها على خدها.
وفي الصباح اليوم الثاني الكل راح داومه ومصعب قضى ليلته في مكتبه الخاص اللي فيه غرفه جانبيه وفيها سرير صغير طلع من البيت من دون مايكلم أصيله أو أي حد بالبيت وركب سيارته وتحرك السايق الى الشركة ووصل مكتبه وجلس خلف مكتبه حس بتعب وتعرق دخلت عليه السكرتيرة شيماء وقالت: العم مصعب العم مصعب شوفيك العم مصعب.
مصعب يتصبب عرق وماقادر يتكلم؛ طلعت بسرعه شيماء ورفعت سماعة تلفون مكتبها وطلبت سيارة إسعاف.
البنك
نايف داخل مكتبه وهو يخلص أوراق ويراجع الأرقام البنكيه دخل عليه زميله بالعمل محمد اللي قال حقه : ها بشر كيف كانت الأجواء لما خذيت الخاتم حق زوجتك؟
نايف يأشر على محمد أنه يسكت وقام يصكر باب مكتبه وقال: شوفيك أنت تبي تفضحنى.
محمد : ليش مخلي الأمور أوفر ترا عادي من راح يسمعنا كل واحد مشغول بمكتبه.
نايف: أقولك لا تتكلم بهاي الأمور هنيه بالدوام إذا تبي نكمل شغلنا مع بعض.
محمد: أوك خلاص ماله داعي تتعصب بعد شوي برسلك كشف حساب مال واحد من الهوامير الشياب اللي فلوسهم ماتكلهن النيران دقق بالأرقام عدل ودور لنا على طريقه ناخذ منه مبلغ محترم من دون ما يحس نفس الحساب الأولي.
نايف: بس خلاص بنتفاهم بعدين روح مكتبك.
محمد: ولا يهمك يالكينغ أشوفك بعدين.
المستشفى
سندس تودي تحاليل المرضى للمختبر وتلتقي مع صديقتها تهاني اللي قالت حقها : شفتي هيفاء مسؤولة قسم التنويم؟
سندس : لا شو فيها؟
تهاني : البنات حواليها يهننها بسيارة الجديده.
سندس : زين فكت نفسها من أذيك السياره التعبانه اللي كانت معاها حتى الواحد فضيحه يركب فيها ويجي فيها الدوام وأنا مسؤولة قسم.
تهاني : هيه والله صدقتي؛ لحضه شو هذا اللي بيدك.؟
سندس : شو فيه؟
تهاني : واااي الخاتم يجنن تستهبلين متى اشتريتيه؟
سندس : هداني إياه زوجي حبيبي أمس لما كان عازمني على الغدا.
تهاني :والله هذا الزوج ولا بلاش مايخلي شي بخاطر زوجته مب اللي عندي اللهم لا إعتراض.
فيلا مصعب
أصيله جالسه ومعاها شذى اللي تصب الشاي حقها وحق أصيله وهيه تقول :وهذا اللي صار؛ بصراحه البارحه طول الليل راسي مصدع ونمت متأخره.
شذى: خبرتك لا تستعجلين وتتنازعي معاه بس أنتي ماتسمعين الكلام؛ وهو بعدين وين نام؟
أصيله : نام في مكتبه وطلع اليوم من دون ما يقول ولا كلمة أونه زعلان.
شذى : خليه بيرضى ماراح يطول زعله بس أهم شي لا تحتكي معاه وحاولي تنهي هاي المشكله اللي معاه.
أصيله: فيني حره من داخلي والله.
شوي ورن تلفونها ردت أصيله : هلا من معاي؟
شيماء: هذا أنا شيماء سكرتيرة العم مصعب.
أصيله : هلا شيماء تفضلي.
شيماء: أم نايف تعب علينا العم مصعب بالشركة وطلبنا حقه سياره إسعاف.
أصيله : شو تقولي ووين هوه اللحينه؟
شيماء: بالمستشفى حالياً بقسم الطوارئ.
أصيله تغلق الخط وهيه في حالة صدمه وخوف على مصعب.
يتبع…
