المهدي تركي الرياحي
السالفة من غير نقد ومشاريه
تحصل معي وملازمه مثل ظلي
يأخذني التفكير دايم وأخاويه
أنسى مكاني أين وأروح كلي
وإذا سألني من معي بس أقول إيه
لكن قل لي كل ما قلت قل لي
عيد الكلام الآن أنا أسمعك ووحيه
رجعت للواقع عقب طير يا اللي
الحب لو بعضٍ من الناس يخفيه
أهرج معه وتشوف هرجك يزلي
وتلقى هواجيسه من البعد تلفيه
لو كان هو فالصف الأول يصلي
مثلي ترى يالربع من غير تسفيه
أنا اشهد أن اللي حصله حصلي
الغالي اللي طول عمري وأنا اغليه
أروح له وأعود وأنا محلي
وسط العرب ماودي أجيب طاريه
وأنسى واسولف به علومٍ تدلي
وإليا أنتبهت أقول ما السالفة فيه
هذي سوالف واحدٍ قايلٍ لي
