الشاعر: أحمد عبد الحق
بيني وبينك
حروف ورافضه تتكتب
أحساس جواني
رقتك وحناني
كداب اللي يقول
العمر أيام بتتحسب
بيني وبينك
إحساس سابق عصره
كلام موزووون
عاقل مجنون
فقير يتباهي بقصره
أنين بحنين
مين بيحس بمين
حرف أتعود علي سطره
كل شويه بتسألوني
إيه اللي بينك وبينها
الجمال اللي قوامها
الإشتياق اللي في عيونها
الخدود الوردي هي
ولا الحسن اللي ماليها
سبحانه ربك
هو وحده اللي رسمها
حد فيكم حس بيها
حد فيكم لمس وجعها
ولا حس في يوم انينها
صعب حد يحسك زي
أصل اللي عنده شعور
همس…لمس..وكمان
أجمل إحساس يجمعنا
لما الروح بتلمس نفس
هي العمر الباقي في عمري
وهي الهمس
وقت ماتلمس
كل مافيه
برقة وهمس
ياسلام لما الحب نشوفه
والأجمل لو يتحس
اه ياحبيبتي من أحساسي
صعب حد يقولك
لازم علي طول يتحس
بحبك وده مش سهل
الأصعب منه لما تكوني
البيت والأهل
أيوه بحبك وأنكر ليه
هما الجزء الضايع فيه
وأنت الكل
وأنت الأمل المرسوم ليه
بورد وحب وفل
كل اللي فات مات
أوعى تحسبيه
واللي أتسرق مني
عمري ماهبكي عليه
اللي راح عدي وأنتهى
مالوش لازمة
اعتبريه حلم و مات
من حساباتك يلا أرميه
