الكاتب :سمير الشحيمى
( بس وقف عندك) قالتها أصيله حق السايق يوقف أمام السيتي سنتر شوي وفتح باب السياره وركبت شذى وقالت لها أصيله: شفتي الغبي لزم علي إنه أجي عشان ياخذ فلوسه؛ أنتي ليش عطيتيه رقم تلفوني؟
شذى : بشو تبيني أحلفلك بأن ما أنا اللي عطيته رقمك؛ أنا من أستلمت مكالمتك وتقولي اللي صار معاك إتصلت عليه جهازه مغلق فجيتك على طول هنا.
أصيله : أيوه لزم أبيك تجي معاي ماخليه ينفرد فيني بروحي.
رن تلفون أصيله مكالمه من المختطف: لازم تخلي شذى تجي معاك؟
أصيله : أبيها معاي.
المختطف : نزلي من السياره ودخلي من الباب اللي جنب محل العطور ولا تصكري الخط.
نزلت أصيله مع شذى وجنطة الفلوس معاها ووصلت داخل السيتي سنتر قال لها المختطف: في ريال في آخر الممر لابس دشداشه بيضا وعلى راسه كاب أزرق.
أصيله : أيوه شفته.
المختطف : أتبعيه.
تحرك الريال من شاف أصيله هو يمشي ووراه أصيله وشذى حتى آخر السيتي سنتر في باب خلفي قال لها المختطف : اللحين راح تركبين السياره معاه وراح يجيبك معاي.
وصكر الخط وقالت أصيله : أقولك هذا يباني أركب معاه بسياره.
شذى : لا نضيع وقت خلينى نركب معاه.
ركبو معاه السياره وتحركت السياره من خلف باركنات مركز الشرطة القديم بتجاه دوار المازدا إلى حارة القرامطه.
قالت أصيله: هذا المكان ماغريب.
شذى : هاي حارة القرامطه من ما يعرفها.
وقفت السياره جدام بيت مهجور وقال الريال اللي يسوق : انزلوا وادخلوا داخل البيت.
نزلت أصيله ومعاها شذى قالت أصيله : هذا البيت بيتي القديم اللي كنت عايشه فيه زمن المرحوم أبو نايف.
شذى : متأكده؟
أصيله : أكيد متأكده هذا الشي ما ينسى أسوء أيام عمري عشت فيه.
شذى : خلينا ندخل.
دخلن البيت والمختطف بالحوش واقف واللي بانت ملامح وجهه كلها وهو يقول : هلا بيك أم نايف هلا بنت العم منورين.
شذى :أنت صاحي يا منذر؟
أصيله: إسمه منذر؛ أنت كيف تتجرأ تتصل فيني وبعدين تعرف هالبيت حق من عشان جايبني فيه؟
منذر يضحك : رقمك ورقم أي شخص أقدر أجيبه ثانياً هالبيت أعرفه إنه ملك حقج من زوجك المتوفي.
أصيله : كيف تعرف أنت هاي الأمور كلها؟
منذر : بيت عايلتي ورا بيتكم بالضبط وأعيالك خاصه نايف يعرفني زين مازين نحن ربع أيام الدراسه؛ على العموم خلينى من هذا كله البنت الملاك حياة موجوده داخل هالبيت ومن 3 أيام وماعرف شو نهاية هاي السالفه.
أصيله : المفروض أنه نتخلص منها بس اللحين الشرطة مفتحه عينها علي ومافي فايده نقتلها هالوقت لين تبرد سالفة إختفائها.
منذر : أنا كنت متفق معاك على أساس خطف بس إذا السالفه فيها قتل المبلغ راح يزيد.
أصيلة : بدفعلك لا تحاتي.
عقت عليه الجنطه وقالت : هاي دفعه أولى من المبلغ 25 ألف ريال وبتحصل على مثلهن من تتخلص منها.
منذر يفتح الجنطه ويبتسم لما شاف الفلوس وقال :موضوع ازهاق الأرواح يكلف أكثر.
أصيله :كم؟
منذر :50 ألف ريال.
أصيله أطالع شذى وقالت :موافقه.
منذر :ماتبي تدخلي تشوفيها؟؟
أصيله : زين بس أهم شي ماتشوفني.
منذر : عيونها مربوطه.
أصيله :وينها؟
منذر :اتبعيني.
فتح منذر باب الصاله ودخلوا داخل وكانت حياة مربوطه على الكرسي ومغمضه العينين.
قربت منها أصيله وحطت ايدها على رأس حياه اللي قالت : من من أنت؟
صمت لا جواب من أصيله قالت حياة: طلعوني من هنيه أرجوكم أبي أطمن على أبوي مصعب طلعوني.
أشرت أصيله على شذى عشان يطلعون من البيت.
سيارة التحريات
2 من الشرطة المدنيين مكلفين بمراقبة أصيله قال الأول : هاي دخلت السوق مع ربيعتها وماطلعن للحين.
الثاني : تعرف الحريم لما يدخلن السوق مايخلصن بسرعه.
الأول : ما مطمن بنزل أشوف وين سارن.
الثاني :خلي عنك أجلس مكانك.
الأول : برجع بسرعه لا تحاتي.
نزل الشرطي وراح داخل السيتي سنتر وقال زميله : عايش جو جيمس بوند الصاحب.
الشرطي اللي نزل خذ لفه على جميع محلات السيتي ولكن ماشي أثر حق أصيله وشذى بعد ١٠ دقايق رجع لسياره وقال لزميله : مالهن أثر.
الثاني : ماحصلتهن ولا شو السالفه؟
الأول :محد مب داخل السيتي سنتر.
الثاني : يمكن مادورت عدل أو راحن محلات اللي جنب السيتي سنتر.
الأول :ما أعرف بصراحه.
شوي وظهرن أصيله وشذى من السيتي سنتر فقال الشرطي : ها هذيلا هنه كيف تقول محد بالسوق؟
الأول : والله دورت عليهن محد داخل من وين ظهرن مره ثانيه.
الثاني :أبوي أنت داير راسك.
الأول :شاك أنهن ما كانن بالسيتي سنتر.
وتحركت سيارة أصيله متجهه إلى خظراء السيح.
فيلا مصعب
الكل على طاولة الطعام لوجبة العشا قالت أصيله : دام الكل هنيه حابه أقولكم شي.
مزن : بس سندس مب موجوده.
أصيله أطالع نايف اللي كان ساكت ومتضايق قالت له : وين زوجتك سندس عندها مناوبه الليله في المستشفى؟
نايف : لا؛ راحت بيت أهلها.
أصيله:سلامات فيها شي؟
نايف : شوي معصبه علي.
أصيله : ما عليه راح ترضى مع الوقت.
حيدر : شو حابه تقولي الوالده؟
أصيله : بخصوص الشركة راح يكون مسؤول عنها عمكم فارس هو المدير العام.
نايف : كيف كذيه شو دخله العم فارس بشركة العم مصعب؟
أصيله : مر علي محامي الشركة وقالي أن إدارة الشركة من بعد مصعب تروح لفارس وهاي أوامر من مصعب وفي أوراق رسميه بخصوص هالشي.
مزن :يعني شركة عمي مصعب ماهيه لنا اللحين؟
أصيله :لا يا بنتي الشركة لنا بس إدارتها فقط بتكون عند فارس. وأزيدكم من الشعر بيت أن أحمد زوج أختكم ضحى مكتب المحاماه اللي يشتغل فيه هو اللي يدير أمور شركة مصعب القانونيه.
نايف : معقوله ما سمعته يجيب طاري هالشي.
أصيله : حتى أنا تفاجأت بس هاي كانت أوامر مصعب أن نحن مانعرف هالشي.
تماضر : وشو صار في موضوع حياة وين وصل البحث عنها؟
أصيله: بعده كل شي مثل ماهو مافي جديد أدعو الله أنه يحصلونها بخير.
مزن : آمين يارب.
غرفة مصعب الطبيه
الممرضه جالسه عند سرير مصعب ودخلت عليها أصيله وقالت لها :ها كيف الامور معاك.
الممرضه : الحمدلله بخير مافي جديد وضعه مثل ماهو.
أصيله : زين زين؛ ممكن تخليني معاه شوي روحي تعشي غيري جو مال نص ساعه بعدين رجعي هنا.
الممرضه : زين أنا بطلع الحديقة بكلم ولدي وبرجعلك بعدين.
طلعت الممرضه وخلت أصيله ومصعب بروحهم جلست أصيله بجانب سرير مصعب وحطت إيدها على خد مصعب ومسحت على جبينه ومسكت إيده وإبتسمت وقالت :نومتك طولت حبيبي لما تكون نايم جنبي وأصحى أجلس أتأملك؛ تعرف أفتقدك حاسه بنقص داخلي كل يوم أصحى من النوم أتخيلك موجود جنبي أو تدخل علي بعد كل نهاية يوم نسولف ونتناقش ونتهاوش؛ لك وحشه يا مصعب كثير اشتقتلك؛ تذكر لما جيت تتقدم حقي من بعد وفاة زوجي أبو نايف قلت لنفسي جاك الفرج يا أصيله في ريال بيطلعك من حياة الفقر اللي عايشتها وبترتاحي ولكن بعد 3 شهور من زواجنا تروح رحلة عمل لإيران وترجع من هاي الرحله الناس تجيب هديه حق أزواجهم أنت كنت جايب لي بنت صغيره ملفوفه بقماط وتقولي هاي البنت تبنيتها تعرف بشو حسيت وقتها؟ بالغيره والكره من هاي اللي تتسمى حياة؛ دمعت عينها أصيله وأستمرت بالكلام : وفوق هذا كله ما بغيت تجيب مني إعيال بس أريد أعرف السبب ليش؛ تروح تتبنى فيك حب للأطفال كنت مستعده اجيبلك بدل الياهل 3 يهال بس أنت كنت رافض بحجة صحتك مب على بعضها وأنا أشوف أذيك الفتره صحتك أحسن من صحة زوجي المرحوم بوايد؛ على فكرة تعرف من شفت اليوم؟ شفت حياة أيوه حياة بعدها حيه بس مؤقتاً كان ودي أتخلص منها بس من بعد ما أتخلص منك؛ أنا أحبك وعلى كثر ماحبيتك كرهتك لأن الوضع كذيه ما يريح بأمانه وأنا أشوفك جالس تهدم كل اللي أنا بنيته من أحلام وأماني وتعطي الاولويه لحياة اليتيمه اللي مانعرف من أهلها أظن أنك تعرف من أهلها من هاي اليتيمه اللي معاها ملكية بيت في إيران وبعد أكتشفت من ضمن الأوراق اللي بمكتبك في الشركة أن في بنايه في إيران بعد بأسم حياة شو سر هاي العايله اللي تخلي بنت يتيمه بدار الأيتام وهم معاهم هاي الأموال كلها عشان كذيه قررت أبدء أخطط وكيف أخلي كل شي لصالحي أنا؛ موضوع أن الشركة يديرها فارس راح يخليني أتراجع؟ لا بالعكس راح أستمر كانت فكرة ذكيه منك بس مايهم ماباقي شي كلها أيام وبصير مالكه لكل شي بحكم القانون والشرع.
إبتسمت إبتسامه خبيثه وخديها جفت بها الدموع.
يتبع…
