المهدي تركي الرياحي جدة . السعودية
تنفس فيك نور الفجر وأصبح كل نورك فيه
وأنا في كل يوم أطالع الفجر و تنفاسه
ياوردٍ في صباحه كل قطرات الندى ترويه
عبق عطره بنسمات الصباح وهب نسناسه
عقب مازاد حبك شاعرك عجزان لا يخفيه
وهو يعرف من أوصافك غيور وحيل حساسه
وصرتي مثل نور العين يوم يخاف ويداريه
ومشكلّةْ المولع بالغلاء يزيد وسواسه
دخيل أمك وأبوك أنا يتيمٍ جاء يمد ايديه
وحبك ملاكه من كعب رجلينه ليا راسه
عطاك الله جمالٍ لو على غيرك ذبحه التيه
وأنا أقول الجمال انتي فروعه وانتي أساسه
تعالي في فوادي ماحدٍ غيرك شريك فيه
وثمن هذا اتركي لي لاشربتي شي فالكاسه
لاعل الجغمة اللي باقية جرح الغلاء تطفيه
لاحيث إن المشاعر يوم زاد الشوق منحاسه
أنا أشوف الزمن مجنون متقلب وفيه وفيه
وأخاف اليا خذوك الناس يحصلي تنكاسه
هذا سرٍ وأنا مضطر في هذا النهار ابديه
أشوفك دانةٍ وصلك سبابيحٍ وغطاسه..
