الكاتب :سمير الشحيمى
الجميع في المزرعه والجو جميل ورائع نايف وحيدر وأحمد يجهزون العشاء من مشاكيك بجميع أنواعها وشوي السمك والمأكولات البحريه؛ قال حيدر:والله هالدخان مال الشوي حرقلي عيوني.
أحمد : شغل المروحه عليها عشان تغير إتجاه الدخان عنك خبرتك من متى بس أنته ماتسمع الكلام.
نايف: خليه خليه عاجبتنه الريحه والدخان يدخل بعيونه.
يضحكون وقال حيدر : أنت خلي عنك التنكيت وضبط أمور الحبار والروبيان لأن عمي مصعب يحب البحريه خاصه اذا مشوي.
أما سندس وتماضر وضحى يجهزون السلطات بأنواعها؛ قالت تماضر: السلطة مع جبنة حلوم وااايد زينه ترا.
سندس: أنا من أخلص من سلطة الفواكه بسوي سلطة الخضار وبسويله جبنه حلوم ولا يهمج.
تماضر : تسلمين حبيبتي؛ تصدقي الشوربه البحريه شكلها بتطلع تجنن ماباقي شي وتجهز.
ضحى: هيه والله أشم ريحتها تضرب بالراس.
أصيله مرت على البنات وقالت: ها يا بنات كيف الأوضاع معاكم؟
ضحى: مره تمام يا أمي.
أصيله : شغلج حلو بنتي ضحى ومن منظر الحلويات اللي مسوتنهن أن التحليه بتكون جنان على هالجو من بعد العشا.
سندس : لا تحاتي ياعمه كل شي بيكون فوق الممتاز بس لو كانت الخدامه تجي تساعدنا شوي.
أصيله: الخدامه مشغوله داخل الفيلا تنظف وترتب عشان النوم من بعد الأكل و السهره.
تماضر: ليش ماراح نرجع البريمي من بعد الرمسه؟
أصيله: لا؛ عمج مصعب قال أنام هنيه وباكر المساء نرجع البيت؛ اللتفتت يمين يسار بعدها كملت كلامها : وين بنات الجامعه؟
ضحى : تقصدي مزن وحياة؟ بالمطبخ التحضيري يسوون مشروبات من عصاير كوكتيل وموهيتو وآيس كريم.
أصيله: والله زين بس أهم شي ما تسممنا حياه؛ يالله أنا بسير عند عمكم مصعب من يجهز كل شي خبرونا.
راحت أصيله وقالت تماضر : ضحى أنا مستغربه من أمج ليش تكره حياة هالكثر؟
ضحى : خليها على الله وكملي شغلك عشان نخلص.
وفي المطبخ التحضيري حياة ومزن يجهزن العصاير بأنواعها قالت حياه : هالمهيتو اللي سويته بيطلع خرااافي صج.
مزن: شو من النكهات سويتي؟
حياه: الأزرق والفراوله ونكهة الريد بول.
مزن : يمي عيل أنا أريد بنكهة الريد بول.
حياه: لا تحاتي مسويه من كل شي كميه تكفي للجميع؛ وأنتي وين وصلتي من أذاك الوقت وأنتي على الخلاط.
مزن: جهزت عصير طبقات وعصير مانجو بلأناناس واللحين ملك شيك بلآيس كريم.
حياة : والله يبيله مشروع من الخاطر على الإبداعات اللي نسويها.
مزن : لالا؛ حقج أيوه أنا لا برستيجي الجامعي مايسمح بس هاي هوايه وحب إبداع فقط.
حياة : أمورج طيبه يا خاتون.
مزن بدلع: من حقي محد قدي.
وفي الحديقة مصعب جالس بمكانه المخصص بالجلسه وقدامه التلفزيون كبير يتابع القنوات والمسلسلات تاره ومرات يحط على قناة الإقتصاد ومره يحط على قناة ديسكفري وبجنبه قفص فيه طيور كناري جات أصيله وجلست جنبه وقالت: ها حبيبي سمعت اليوم إنك محول المزرعه لمكتب تخلص فيه شغلك؟
مصعب: أنت حاطه حد يراقبني؟
أصيله : لالا ليش أراقبك؟
مصعب: عيل شو عرفج أن أنا بالمزرعه طول اليوم وشغلي هنيه خلصته؟ أنا ماخبرت حد إن أنا جاي المزرعه غير شيماء وعلى حد معرفتي بشيماء ما تتواصل معاج.
أصيله : سألت السايق وخبرني كليتني بقشوري حشى وبعدين شوفيها إذا سألت وعرفت مكانك وين ما من حقي؟
مصعب: لا ما من حقج مخبرنج من زمان مالازم كل شي تعرفينه عني وعن شغلي وخاصه عن شغلي هذا طبعي وأتمنى أنج تحترمي هالشي.
أصيله: يا كلمه ردي مكانج مايسوى علي قلت شي خلاص أنا آسفه؛ أنزين شو سبب اللي خلاك تجمعنا كلنا بالمزرعه اليوم؟
مصعب: ولا شي وأنا طالع من البيت أوصل حياة الجامعه جى في بالي أجي المزرعه على طول جيت المزرعه وأتصلت على شيماء تجيب الأوراق وتجي المزرعه وأستقبلت كم شخص هنيه وخلصت شغلي بدري قلت ليش ما تجي العايله كلها ونجتمع بالمزرعه دام كل أسبوع نتلاقى بالبيت خلينا نغير ونجي المزرعه وعطيتك خبر وهيك.
أصيله : شورك طيب بصراحه خاصه إن اليوم الجو وايد حلو.
مصعب : الله يحلي أيامك؛ بالفعل الجو اليوم من الصبح مغيم وحلو.
نايف وسندس ينادون بأعلى صوتهم إن العشاءصار جاهز والكل يجمع عند طاولت الطعام اللي بجنب نافورة الماء المستديرة؛ قالت أصيله: أجيب عشاك لهنيه بدل ماتقوم بخلي يجيبون كل شي لحد عندك.
مصعب وهو يوقف: وليش عاد أنا طالع أغير جو وأستانس بهاي اللمه وأنت تقولي أجيبلك أكلك هنيه؛ لا بسير عندكم لطاوله وناكل جميع ونستانس يالله رحنا.
يتبع…
