الشاعر: أحمد عبد الحق
شايفك حايرة
خايفه
طب وده ليه
تفتكري فيه من غيرك
حضن حنين أجري عليه
مهما حلمت أحلام ورديه
أنت الحلم
أخت وبنت
ولما أتوجع بتبقي الأم
والإحساس اللي أنا فيه
قلقانه ليه
وانت العمر الباقي وانت
كل ما فات
وانت الصبراللي بعد المر
وأنت العمر
أنا ياحبيبتي وهبتك
روحي وقلبي
شبكة بسيطه تبقي المهر
وأنا وحياتك كلي عشانك
حرفي عشانك
حسي عشانك
تساوي إيه الدنيا
من غير شوقي
جوه حنانك
تفرق ايه لما يعدي
العمر الباقي
أرجع وأعيشه تاني أوأنك
لساكي خايفه
لو فتشت في لحظه
أنا جواكي
يمكن تبعد فينا ظروف
برضو معاكي
أوعى يتمكن منك خوف
إن كان رحلاتي كتير
لازم ترجع مرساكي
كل ما أحبك أكثر
حسادك بيحاولوا يمنعوني
يكدبوا..بيتوهموا
قال إيه كده هيبعدوني
لا والله العظيم
مهما قالوا
مهما كدبوا
حبي ليها إيمان في قلبي
حد يقدر يخش قلبي
وينزع منه نور يقيني
أطمني ياروح فؤادي
كل شيء موجود بتمن
الأيام كفيلة تمحي
من حياتنا تجاعيد الزمن
أطمني ياحبيبتي
حياتي ليكي
حروفي بيك
أبسط حاجه هديه ليك
أقدم روحي وقلبي التمن
أطمني قلبي عندك
قلبي ميعرفش غيرك
زي نور وخش قلبي
زي طيرك
مهما طار وراح بعيد
استحالة يلوف بغيرك
كتروا الحاسدين
المحرومين
اللي عاملين عاشقين
اللي عاملين أصحاب ولكن
من جواهم حاقدين
ممكن سؤال لو مش بحبك
بالله عليكي قوليلي
بينهم طيب هحب مين
