محمد جمعان الدوسري
البيت لو ركنه من السوس منخور///
ماتصلحه حتى ترمرم اساسه
والخوة اللي ماتذري من الجور///
ماتنفعك لضك وقتك عماسه
اعرف خويك لاغدا الوقت ممرور///
من تاه ظنه افختته الفراسه
واللي كساه الجهل ولفه غرور///
لابد مايندم ويجني غراسه
واللي غشاه الحمق والحمق مخطور///
يجني حصاده لاسبر في مراسه
كم(ن)عليل(ن)
فالشقا عاش محسور///
شرب هماج الضيم والغيي حاسه
الهم لامن طاش سجين مسجور///
ما تبرى العله اذا ذقت كاسه
اشفق على نفسك اذا كنت محصور///
قيد الاسى والضيم عالي قياسه
تشرقني العبره وانا الف وادور///
بين الحزون ومالقيت الوناسه
وتدوي بي امواج(ن)عظيمات في بحور///
فيها لهيب القلب زاد انغماسه
متعلق(ن)بالحلم والحلم مخطور///
يغيب مني غصب ويلف راسه
واجلس مع الهاجوس
اشب دافور///
من لاهب يقطر علييه قباسه
فالهم بركان(ن)اذا لزك ايثور///
يحرق صفا الدنيا بضيق وشراسه
واللي يحسب احساب نفسه ولا يخور///
يبعد بعيد لايعنيه باسه
من لا يحشم ابوه مهوب معذور///
ومن لاتبصر ما انفعته الدراسه
مهوب لاجاهل ولاهوب مجبور///
يدس راسه وسط سوق النخاسه
بيت النشاما لو هو صغير معمور///
يشرق به المعروف ود ووناسه
والطيب يبقى بين الاجواد مشكور///
وكل(ن)على شكله يحدد مقاسه
من لا يراجع خطوته ما نفعه شور///
اهل الوجيه الكالحه والدناسه
كنه على كف الرجا طيف مشعور///
جهله شراه وذاهب الراي حاسه
من التجارب يوم فكرت في سطور////
ان الزمن دفتر يبي له دراسه
فاللي جفاه الفهم مهوب معذور///
وكل(ن)على قده يفصل مقاسه
