الشاعر : محمد عبد العزيز رمضان
حلمي أنجح أبقى حاجة
وأمسك النجم بإيديا
نفسي ألقى نفسي تاني
نفسي أسبق نور عنيا
نفس أسأل يوم ألاقي
للسؤال دايما بقية
بس نجمي نجم عالي
نجمي صعب بعيد عليا
نجمي أصعب م الليالي
حلمي إنه يرضى بيا
حلمي أنجح أبقى حاجة
وأهزم الخوف والظنون
وارسم الحلم لحياتي
لو هخاف إزاى هكون
هسقي حلمي بنور عنيا
مش هبيعه أو هخون
يكبر الحلم في ثواني
والورق يملى الغصون
حلمي أنجح أبقى حاجة
يرجع الحلم اللي مات
هقتل الوهم اللي عشش
جوا قلبي بالساعات
هقدر أهزم كل خوفي
وأبتدي بقوة وثبات
مش هكون عبد لظروفي
أشتكي حظي اللي فات
همسك الحلم اللي عدى
مش هعيش في الذكريات
حلمي أنجح أبقى حاجة
ولطريقي مافيش رجوع
مهما ليل الحزن يطول
بكرا هنقيد الشموع
شمس بكرا علينا تطلع
تختفي كل الدموع
نقلع الآهات ونزرع
عزمنا وما فيش خضوع
للكسل واليأس نقلع
والأمل يصبح فروع
واللي عايز يبقى حاجة
راح يقف رغم الوقوع
