الشاعر محمد عبد العزيز رمضان
محتار يا قلبي أصدقه
أو أكذبه وأحنّي ليه
محتار لأني بعرفه
كداب ومش هندم عليه
ياما كتير أنا قلته
يا خسارة كله كان ناسيه
ضيعني ضيع حلم بنَّا
كان حقيقة بين إيديه
أصبح خلاص وهم وحكاية
صعب تاني هيلاقيه
والدمع بعد الفرح ساكن
أيوة ساكن بين عينيه
والنار بتحرق جوا قلبي
لو في يوم فكرت فيه
محتار يا قلبي إني أرجع
لا خلاص صعب الرجوع
أنا صعب إني أديله قلبي
صعب أقبل بالوقوع
هقدر أقوم من تاني هقدر
أمسح الخوف والدموع
محتار يا قلبي إني أبعد
وإلا أفضّل ليه قريب
خنِّي وخان كل اللي بنَّا
خلى ظني فيه يخيب
لو كان حقيقي هو صادق
عني عمره ما كان يغيب
ورماني فوق بحر الليالي
ليَّا في الأحزان نصيب
محتار يا قلبي إني أهرب
وإلا أغرق في الوعود
لو يوم حاولت إني أقرب
ألقى حبي مالوش وجود
وندمت إني فضلت أجرب
اللي مات مش راح يعود
